Foton on ads news final
Cct850x100 1
Cc time 1800 x 300
San house

អ្នកនាំពាក្យ៖អ្នកលក់អនឡាញជាច្រើនរយនាក់នាំគ្នាសម្រុកមកចុះបញ្ជី និង អាជ្ញាប័ណ្ណ

សេដ្ឋកិច្ច
/
អ្នកយកព័ត៌មាន:
ហួ ឆេងស៊ីម
/
ឯកឧត្តម ប៉ែន សុវិជាតិ អ្នកនាំពាក្យក្រសួងពាណិជ្ជកម្ម  

ភ្នំពេញ៖ អ្នករកស៊ីធ្វើអាជីវកម្មតាមរយ:ប្រព័ន្ធអនឡាញ បានសម្រុកនាំគ្នាទៅក្រសួងពាណិជ្ជកម្ម ដើម្បីធ្វើការស្នើសុំចុះបញ្ជី និង ពិភាក្សាអំពីព័ត៌មានផ្សេងៗស្ដីពីការធ្វើពាណិជ្ជកម្មតាមប្រព័ន្ធអេឡិចត្រូនិក។ សកម្មភាពនេះ កើតមានក្រោយពីក្រសួងពាណិជ្ជកម្មបានប្រកាសថា ក្រសួងនឹងផាកពិន័យទៅលើអ្នកប្រកាបអាជីវកម្ម តាមរយ:ប្រព័ន្ធអនឡាញដែលមិនបានស្នើចុះបញ្ជីពាណិជ្ជកម្មជាមួយនឹងក្រសួង ចាប់ពីថ្ងៃទី០១ ខែកក្កដាខាងមុខនេះ។

ឯកឧត្តម ប៉ែន សុវិជាតិ អ្នកនាំពាក្យក្រសួងពាណិជ្ជកម្ម បានប្រាប់ស៊ីស៊ីថាមស៍នៅថ្ងៃនេះថា ការចុះបញ្ជី និង អាជ្ញាប័ណ្ណនេះ គឺក្រសួងបានធ្វើការពន្យារពេលចំនួន៣លើករួចមកហើយ ហើយនេះគឺជាកាតព្វកិច្ចមួយដែលតម្រូវឱ្យអ្នករកស៊ីតាមប្រព័ន្ធអនឡាញត្រូវតែមកបំពេញកាតព្វកិច្ចមួយនេះ។

បើតាម ឯកឧត្តម ប៉ែន សុវិជាតិ មកទល់ពេលនេះ គឺជាពេលជិតដល់កាលកំណត់ការផាកពិន័យសម្រាប់អ្នករកស៊ីតាមប្រព័ន្ធអនឡាញ មានអ្នករកស៊ីតាមប្រព័ន្ធអនឡាញយ៉ាងច្រើន បានមកក្រសួងពាណិជ្ជកម្ម ដើម្បីស្នើសុំលិខិតអនុញ្ញាតនិងអាជ្ញាប័ណ្ណតាមប្រព័ន្ធអនឡាញ បង្កឱ្យមន្រ្តីមួយចំនួនមិនអាចផ្ដល់សេវា ឬឆ្លើយតបទៅនឹងសេចក្តីត្រូវការនេះបានទាន់ពេល។

ឯកឧត្តមបន្តថា មកទល់ពេលនេះ ក្រសួងក៏ពុំទាន់បានសរុបស្ថិតិនៃការចុះបញ្ជីរបស់អ្នកប្រកបអាជីវកម្មតាមប្រព័ន្ធអនឡាញនោះឡើយទេ ប៉ុន្តែក្រសួងកំពុងធ្វើការត្រួតពិនិត្យក្នុងការផ្ដល់អាជ្ញាប័ណ្ណ និងលិខិតអនុញ្ញាតដល់ក្រុមហ៊ុនមួយចំនួនធំរួចរាល់ហើយ។ ចំពោះលិខិតអនុញ្ញាត និងអជ្ញាប័ណ្ណនេះគឺមានសុពលភាព ២ឆ្នាំសម្រាប់បុគ្គល ហើយសម្រាប់លក្រុមហ៊ុនគឺមានសុពលភាព៣ឆ្នាំ។

គួរបញ្ជាក់ថា បើបុគ្គលឬក្រុមហ៊ុនប្រកបអាជីវកម្មតាមប្រព័ន្ធអនឡាញណាមួយដែលខកខានឬមិនបានស្នើសុំការចុះបញ្ជីពាណិជ្ជកម្មជាមួយក្រសួង នោះក្រសួងនឹងធ្វើការផាកពិន័យទៅតាមច្បាប់ដែលបានកំណត់ចំនួន១០លានរៀល៕

Khcct banner

អត្ថបទទាក់ទង