ព្រះសីហនុ៖ តំបន់ទេសចរណ៍កំពង់សោម កំពុងលិចមុខមាត់ជាថ្មីបន្ទាប់ពីបានធ្វើការកែឆ្នៃកូននាគនៃទិសនិរតីមួយនេះ ឲ្យក្លាយទៅជាតំបន់រមណីយដ្ឋានដ៏សម្បូរបែបមួយ ហើយថ្មីៗនេះតាមទិន្នន័យក្រសួងទេសចរណ៍ប្រចាំខេត្តព្រះសីហនុបានឲ្យដឹងថា ចំនួនភ្ញៀវទេសចរណ៍ជាតិ និងអន្តរជាតិដែលមកទស្សនាខេត្តព្រះសីហនុមានប្រមាណ ៥៦,៨២៩នាក់ កើនឡើង៨,៣៣%។
បើតាមមន្រ្តីប្រចាំខេត្តព្រះសីហនុបានឲ្យដឹងថា គិតត្រឹមខែមិថុនានេះ ភ្ញៀវទេសចរណ៍ជាតិព្រមទាំងអន្តរជាតិបានសម្រុកនាំគ្នាមកលេងកម្សាន្តនៅខេត្តមួយនេះជាច្រើន ហើយទិន្នន័យបានបង្ហាញឲ្យដឹងថាភ្ញៀវជាតិនិងអន្តរជាតិមកលេងខេត្តមួយនេះមានចំនួនសរុបប្រមាណ ៥៦,៨២៩នាក់ កើនឡើង៨,៣៣% ដោយមានភ្ញៀវជាតិសរុប ៥០.៥៦៧នាក់ កើនឡើង៨.១៨% ភ្ញៀវបរទេសសរុប ៦.២៦២នាក់ កើនឡើង៩.៦១% ដែលនេះជាចំនួនដ៏វិសេសវិសាលមួយដែលខេត្តមួយទទួលបានជាថ្មីបន្ទាប់ពីរដ្ឋាភិបាលកម្ពុជាបានដាក់ឲ្យដំណើរការប្រទេសឡើងវិញបន្ទាប់ពីវិបត្តិកូវីដបានធូរស្បើយ។
គួរបញ្ជាក់ថា រាជរដ្ឋាភិបាលកម្ពុជា បានកំណត់ខេត្តព្រះសីហនុជាតំបន់សេដ្ឋកិច្ចពិសេសគំរូពហុបំណង និង ជាតារារះនាទិសនិរតី។ ការដាក់ចេញផែនការអភិវឌ្ឍន៍វិស័យទេសចរណ៍ជាបន្តបន្ទាប់ រួមជាមួយសមិទ្ធផលនៃការអភិវឌ្ឍលើគ្រប់វិស័យនឹងជួយឱ្យខេត្តព្រះសីហនុក្លាយជាកន្លែងទាក់ទាញឱ្យទៅសម្រាកកម្សាន្តរបស់ភ្ញៀវជាតិ និង អន្តរជាតិ នាពេលខាងមុខឆាប់ៗនេះ៕
