អ្នកជួញដូរគ្រឿងញៀន៨នាក់ស្លាប់ក្នុងការបាញ់ប្រហារនៅខេត្តឈៀងរ៉ៃ

ឈៀងរ៉ៃ៖ ជនសង្ស័យរត់ពន្ធគ្រឿងញៀន ៨ នាក់ត្រូវបានសម្លាប់និងថ្នាំញៀនប្រហែលមួយលានគ្រាប់ត្រូវបានរឹបអូសបន្ទាប់ពីការបាញ់ប្រហារគ្នានៅតាមព្រំដែនថៃ-មីយ៉ាន់ម៉ាក្នុងខេត្តឈៀងរ៉ៃកាលពីយប់ថ្ងៃសុក្រនេះបើយោងតាមការចុះផ្សាយរបស់កាសែតថៃបាងកកប៉ុស្ត៌។

ប្រព័ន្ធផ្សព្វផ្សាយថៃបានរាយការណ៍ថា ទាហានមកពីក្រុមការងារ Pha Muang ត្រូវបានបញ្ជូនឱ្យទៅល្បាតនៅតំបន់ព្រំដែនក្នុងសង្កាត់ Mae Fa Luang បន្ទាប់ពីមានព័ត៌មានថាក្រុមក្មេងទំនើងនឹងប៉ុនប៉ងរត់ពន្ធគ្រឿងញៀនពីមីយ៉ាន់ម៉ា។ ក្រោយមក ការល្បាតបានប្រទះឃើញមនុស្សប្រហែល ១០ នាក់កំពុងដើរតាមផ្លូវមួយនៅលើជួរភ្នំមួយនៅភូមិ Lisae ក្នុងឃុំ Mae Fa Luang ។ ពួកគេប្រដាប់ដោយអាវុធនិងកាន់បាវ ដោយទាហានបានចូលទៅជិត ហើយបានសុំឲ្យជនសង្ស័យទាំងនោះឈប់។ ប៉ុន្តែជនសង្ស័យបានបើកការបាញ់ប្រហារបណ្តាលឲ្យទាហានបាញ់តបវិញដោយការផ្ទុះអាវុធបានប្រើពេលប្រហែល១០នាទី។

ក្រុមទាហានចំនួនប្រាំបីបន្ថែមទៀតត្រូវបានដាក់ពង្រាយដើម្បីឡោមព័ទ្ធតំបន់នោះ។ ពេលចុះឆែកឆេរនៅតំបន់នោះពេលព្រឹកព្រលឹម គេបានរកឃើញបាវដែលគេបោះចោលចំនួន ១១ថង់ មានថ្នាំគ្រាប់ ប្រហែលមួយលានគ្រាប់។ សារព័ត៌មានថៃបានរាយការណ៍ថា បុរស ៨ នាក់ត្រូវបានគេរកឃើញស្លាប់៕