Cc time
Cct850x100 1
Sme laon web banner(1800 x 300)

រុស្ស៊ីនិងអ៊ុយក្រែនគ្រោងនឹងនាំចេញគ្រាប់ធញ្ញជាតិរាប់លានតោន

អន្តរជាតិ
/
អ្នកយកព័ត៌មាន:
លី ម៉ាលីង
/
រុស្ស៊ីនិងអ៊ុយក្រែនគ្រោងនឹងនាំចេញគ្រាប់ធញ្ញជាតិរាប់លានតោន ប្រភពរូប៖ Archysport

រុស្ស៊ី៖ រដ្ឋមន្ត្រីក្រសួងកសិកម្មរុស្ស៊ីលោក Patrushev ថ្លែងសុន្ទរកថានៅវេទិកាអាហាររុស្ស៊ីកាលពីថ្ងៃទី ២៧ ថា បរិមាណនាំចេញគ្រាប់ធញ្ញជាតិប្រចាំឆ្នាំរបស់កសិកម្មរុស្ស៊ីនឹងលើសពី ៣៧ លានតោន ហើយឆ្នាំកសិកម្មបន្ទាប់ ត្រូវបានគេរំពឹងថានឹងនាំចេញ ៥០ លានតោន។ ក្នុងដំណាក់កាលនេះ អ៊ុយក្រែនក៏មានស្តុកគ្រាប់ធញ្ញជាតិយ៉ាងតិច ២០លានតោន ដែលប្រមូលផ្តុំនៅក្នុងប្រទេស។ បើតាមទីភ្នាក់ងារវិភាគព័ត៌មានឧស្សាហកម្មព្យាករណ៍ថា អ៊ុយក្រែននឹងឈានដល់ការប្រមូលផលគ្រាប់ធញ្ញជាតិ ៤០ លានតោនទៀតសម្រាប់ការនាំចេញ។

ការប្រមូលផលគ្រាប់ធញ្ញជាតិរបស់រុស្ស៊ីនៅឆ្នាំនេះត្រូវបានគេរំពឹងថា នឹងមានចំនួនច្រើនជាងឆ្នាំមុន។ យោងតាមទិន្នន័យពីការិយាល័យស្ថិតិរុស្ស៊ី ទិន្នផលគ្រាប់ធញ្ញជាតិរបស់រុស្ស៊ីក្នុងឆ្នាំ ២០២១ នឹងមាន ១២១.៤ លានតោន។

ចំណែកក្រសួងកសិកម្មអ៊ុយក្រែនបានលាតត្រដាងថា ខ្លួនកំពុងព្យាយាមនាំចេញគ្រាប់ធញ្ញជាតិតាមរយៈការដឹកជញ្ជូនតាមផ្លូវដែកដែលឆ្លងកាត់ព្រំដែន និងបណ្តាញផ្សេងទៀត ប៉ុន្តែសមត្ថភាពដឹកជញ្ជូនមានកម្រិត លុះត្រាតែកំពង់ផែសមុទ្រខ្មៅដំណើរការឡើងវិញ ទើបអាចឈានដល់កម្រិតនាំចេញពីមុន។

អ៊ុយក្រែនធ្លាប់អាចនាំចេញស្រូវសាលី បាឡេ និងពោតជាមធ្យម ៦ លានតោនក្នុងមួយខែ។ តែបន្ទាប់ពីការកើនឡើងនៃជម្លោះរុស្ស៊ី-អ៊ុយក្រែននៅថ្ងៃទី ២៤ ខែកុម្ភៈ កំពង់ផែសមុទ្រខ្មៅរបស់អ៊ុយក្រែនបានឈប់ដំណើរការ។ ក្នុងខែមីនា ការនាំចេញគ្រាប់ធញ្ញជាតិបានធ្លាក់ចុះដល់ ៣០០,០០០ តោន ហើយស្ទើរតែបានស្ទុះងើបឡើងវិញមកត្រឹម ១.១ លានតោននៅក្នុងខែមេសា។

ភាគីរុស្ស៊ីបាននិយាយម្តងហើយម្តងទៀតថា ការដោះស្រាយបញ្ហាស្បៀងអាហារតម្រូវឱ្យមានកិច្ចខិតខំប្រឹងប្រែងជាច្រើន រួមទាំងការដកការនាំចេញ និងទណ្ឌកម្មហិរញ្ញវត្ថុរបស់ប្រទេសលោកខាងលិចប្រឆាំងនឹងរុស្ស៊ី ហើយភាគីអ៊ុយក្រែនត្រូវដោះមីនដែលខ្លួនបានដាក់នៅក្នុងកំពង់ផែសមុទ្រខ្មៅ។

លោក Zelensky បាននិយាយនៅដើមខែនេះថា កងទ័ពរុស្ស៊ីគួរតែដកខ្លួនទៅកាន់ខ្សែទំនាក់ទំនងយោធា ឬខ្សែព្រំដែន ដូច្នេះភាគីទាំងពីរអាចបន្តការចរចា "ធម្មតា" ឡើងវិញ។ ជាការឆ្លើយតបលោក Medvedev អនុប្រធានក្រុមប្រឹក្សាសន្តិសុខសហព័ន្ធរុស្ស៊ី បានបង្ហោះនៅលើប្រព័ន្ធផ្សព្វផ្សាយសង្គមនៅល្ងាចថ្ងៃទី ២៦ ថា លក្ខខណ្ឌបទឈប់បាញ់ដែលស្នើឡើងដោយលោក Zelensky គឺមិនអាចទៅរួចទេ។

យោងតាមទីភ្នាក់ងារសារព័ត៌មាន Interfax របស់អ៊ុយក្រែន បានដកស្រង់សម្តីអនុរដ្ឋមន្ត្រីការពារជាតិអ៊ុយក្រែនលោក Mariar បាននិយាយកាលពីថ្ងៃទី ២៦ ថា ជម្លោះរវាងអ៊ុយក្រែន និងរុស្ស៊ី បានឈានដល់កម្រិតធ្ងន់ធ្ងរបំផុត ហើយស្ថានភាពសង្រ្គាមបច្ចុប្បន្ន គឺពិបាកក្នុងការបង្ហាញសញ្ញានៃការថមថយ រហូតដល់ការចរចាដំណើរការឡើងវិញ៕

Khcct banner

អត្ថបទទាក់ទង