មនុស្សម្នាក់ស្លាប់និង៧៥នាក់បាត់ខ្លួនបន្ទាប់ពីក្រឡាប់ទូកនៅទុយនីស៊ី

ទុយនីស៊ី៖ ឆ្មាំឆ្នេរសមុទ្រទុយនីស៊ីបានរាយការណ៍កាលពីថ្ងៃទី ២៥ ថា ទូករត់ពន្ធពីប្រទេសលីប៊ីបានក្រឡាប់នៅជិតទីក្រុងកំពង់ផែ Sfax ភាគខាងកើត ដោយបានសម្លាប់មនុស្សម្នាក់ និង ៧៥ នាក់បាត់ខ្លួន។

អ្នកនាំពាក្យឆ្មាំសមុទ្របានប្រាប់អ្នកសារព័ត៌មានថា ការស៊ើបអង្កេតបឋមបានបង្ហាញថា ទូកបានចាកចេញពីប្រទេសលីប៊ីនៅល្ងាចថ្ងៃទី ២២ ជាមួយនឹងមនុស្សប្រហែល ១០០ នាក់នៅលើនោះ។ គិតត្រឹមថ្ងៃទី ២៥ កងទ័ពជើងទឹកទុយនីស៊ី និងឆ្មាំសមុទ្របានជួយសង្គ្រោះមនុស្ស ២៤ នាក់ និងស្រង់បានសាកសពម្នាក់ ។ ភាគីទុយនីស៊ី បញ្ជាក់ថា ខ្លួននឹងបន្តស្វែងរកអ្នកបាត់ខ្លួន។

ទីភ្នាក់ងារព័ត៌មាន AFP បានដកស្រង់សម្ដីអ្នកនាំពាក្យដែលនិយាយថា អ្នកនៅលើទូកមកពីប្រទេសមួយចំនួននៅអាហ្វ្រិក និងអាស៊ី។ ចំនួនជនអន្តោប្រវេសន៍ខុសច្បាប់ ត្រូវបានគេរាយការណ៍ថា បានកើនឡើងដោយសារតែអាកាសធាតុល្អប្រសើរក្នុងប៉ុន្មានសប្តាហ៍ថ្មីៗនេះ។

បន្ទាប់ពីរបបកាដាហ្វីត្រូវបានផ្ដួលរំលំក្នុងឆ្នាំ ២០១១ លីប៊ីបានធ្លាក់ចូលទៅក្នុងភាពចលាចល បង្កើតការប្រឈមមុខគ្នានៅភាគខាងកើតនិងខាងលិច។ អាជ្ញាធរមិនអាចគ្រប់គ្រងឆ្នេរសមុទ្រ និងព្រំដែនដីគោក បានយ៉ាងមានប្រសិទ្ធភាពទៀតទេ ធ្វើឲ្យលីប៊ីបានក្លាយទៅជាចំណុចឆ្លងកាត់ដ៏សំខាន់សម្រាប់ជនអន្តោប្រវេសន៍ខុសច្បាប់មកពីទ្វីបអាហ្រ្វិក និងបណ្ដាប្រទេសផ្សេងៗទៀត ដើម្បីរត់ពន្ធទៅអឺរ៉ុប តាមសមុទ្រមេឌីទែរ៉ាណេ។

យោងតាមទិន្នន័យដែលចេញផ្សាយដោយអង្គការអន្តរជាតិសម្រាប់ការធ្វើចំណាកស្រុកកាលពីថ្ងៃទី ២៣ បានឱ្យដឹងថាជនអន្តោប្រវេសន៍ចំនួន ៦,៣៤០ នាក់ត្រូវបានស្ទាក់ចាប់ និងបញ្ជូនពួកគេត្រឡប់ទៅប្រទេសលីប៊ីក្នុងឆ្នាំនេះ ហើយយ៉ាងហោចណាស់មនុស្ស ១២៩ នាក់បានស្លាប់ និង ៤៥៩ នាក់បានបាត់ខ្លួន។

ខណៈនៅឆ្នាំ ២០២១ ជនអន្តោប្រវេសន៍ចំនួនជិត ២០០០ នាក់បានលង់ទឹក ឬបាត់ខ្លួននៅក្នុងសមុទ្រមេឌីទែរ៉ាណេ ដែលកើនឡើងពីចំនួន ១,៤០១ នាក់ ក្នុងឆ្នាំ ២០២០៕