បេថ្លេហិម៖ អ្នកកាសែត Al Jazeera ម្នាក់ដែលគេស្គាល់ឈ្មោះថា Shireen Abu Akleh ត្រូវបានទាហានអ៊ីស្រាអែលបាញ់សម្លាប់ នេះបើយោងតាមក្រសួងសុខាភិបាលប៉ាឡេស្ទីនបានឱ្យដឹងថា កងកម្លាំងអ៊ីស្រាអែលបានបាញ់សម្លាប់អ្នកកាសែតរបស់ Al Jazeera លោកស្រី Shireen Abu Akleh នៅតំបន់ West Bank ដែលកងកម្លាំងអ៊ីស្រាអែលកំពុងតែកាន់កាប់។
បើយោងតាមក្រសួងនិងកាសែត Al Jazeera បានឱ្យដឹងថា នាងត្រូវបានវាយប្រហារដោយគ្រាប់កាំភ្លើងនាថ្ងៃពុធនេះ ខណៈពេលដែលគ្របដណ្តប់ការវាយឆ្មក់របស់អ៊ីស្រាអែលនៅក្នុងទីក្រុង Jenin ហើយត្រូវបានបញ្ជូនទៅកាន់មន្ទីរពេទ្យក្នុងស្ថានភាពធ្ងន់ធ្ងរ។ ក្រសួងបាននិយាយថា នាងត្រូវបានគេប្រកាសថាបានស្លាប់នៅមន្ទីរពេទ្យ។ Nida Ibrahim មកពីកាសែត Al Jazeera ដូចគ្នា បាននិយាយថា កាលៈទេសៈនៃការស្លាប់របស់នាងមិនច្បាស់លាស់នៅឡើយទេ ប៉ុន្តែវីដេអូនៃឧប្បត្តិហេតុបង្ហាញថា Abu Akleh ត្រូវបានបាញ់ចំក្បាលហើយស្លាប់បាត់បង់ជីវិតភ្លាមៗ។
ជាមួយគ្នានេះដែរ នាង Shireen Abu Akleh ដែលកំពុងនិយាយអំពីព្រឹត្តិការណ៍ដែលកើតឡើងនៅទីក្រុង Jenin ជាពិសេសអ៊ីស្រាអែលបានវាយឆ្មក់ទីក្រុងដែលនៅភាគខាងជើងនៃតំបន់ West Bank ដែលត្រូវបានកាន់កាប់ នៅពេលដែលនាងត្រូវបានគ្រាប់កាំភ្លើងបាញ់ចំក្បាល នេះបើតាមក្រុមការងាររបស់នាងបានប្រាប់កាសែត AL Jazeera។
គួរបញ្ជាក់ថា Abu Akleh គឺជា "អ្នកកាសែតដែលទទួលបានការគោរពជាខ្លាំងពីក្រុមការងាររបស់នាង" នាងបានធ្វើការជាមួយ Al Jazeera ចាប់តាំងពីការចាប់ផ្តើមនៃជម្លោះប៉ាឡេស្ទីន នឹងអ៊ីស្រាអែលនាក្នុងឆ្នាំ ២០០០មកម្លេះ ។ ទោះបីជាយ៉ាងណាមិនមានការអត្ថាធិប្បាយភ្លាមៗពីយោធាអ៊ីស្រាអែលជុំវិញការបាញ់សម្លាប់នាងនៅឡើយទេ៕
