ព្រលានយន្តហោះសៀមរាបអង្គរសម្រេចការសាងសង់ជាមធ្យមបាន២២%គិតត្រឹមថ្ងៃទី២៨ ខែកុម្ភៈ ឆ្នាំ២០២២

សៀមរាប៖ អាកាសយានដ្ឋានថ្មីនៃទឹកដីខេត្តសៀមរាប ដែលគ្របដណ្តប់លើផ្ទៃដីទំហំជាង ៧០០ ហិកតា ស្ថិតនៅក្នុងឃុំតាយ៉ែក ស្រុកសូទ្រនិគម សម្រេចការសាងសង់បានជាមធ្យម ២២% គិតត្រឹមថ្ងៃទី២៨ ខែកុម្ភៈ ឆ្នាំ២០២២។ នេះបើតាមការលើកឡើងរបស់ឯកឧត្តម ស៊ីន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិល។

ឯកឧត្តម ស៊ីន ចាន់សិរីវុត្ថា បានប្រាប់ស៊ីស៊ីថាមស៍នៅថ្ងៃនេះថា បើទោះបីជាមានការយឺតយ៉ាវយ៉ាងណាក៏ដោយ ក៏ក្រុមហ៊ុនAIAI (Angkor International Airport Investment (Cambodia) Co., Ltd) នៅតែប្ដេជ្ញាចិត្តក្នុងការជម្រុញ និងពន្លឿនប្រព័ន្ធការងាររបស់ខ្លួនទាំង យប់ ទាំងថ្ងៃ ដើម្បីឱ្យគម្រោងសាងសង់ព្រលានយន្តហោះខេត្តសៀម រាប នេះបានបញ្ចប់ទៅតាមផែនការ។

យោងតាមកម្មវិធីកាងារដែលក្រុម ហ៊ុនទើបធ្វើបច្ចុប្បន្នកម្មរួច បានបង្ហាញឲ្យឃើញថា ការសាងសង់អាកាសយានដ្ឋានអន្តរជាតិថ្មីនេះ គ្រោងនឹងបញ្ចប់ចុងខែមីនា ឆ្នាំ២០២៣ខាងមុខ គឺមានរយ:ពេលសរុប ៣៦ខែ ឬ៣ឆ្នាំ បើគិតចាប់ពីថ្ងៃបើកការដ្ឋាន ពាក់កណ្តាលខែមីនា ឆ្នាំ២០២០។ បន្ទាប់មកគឺត្រូវការរយៈពេលពី៦ខែទៅ៧ខែបន្ថែមទៀត ដើម្បីរៀបចំធ្វើតេស្តដំណើរ និងបំពេញ បែបបទប្រតិបត្តិការរបស់ខ្លួនដើម្បីទទួលនូវវិញ្ញាប័នប័ត្រ ក៏ដូចជាអាជ្ញាប័ន ពីអាជ្ញាធរពាក់ព័ន្ធ ដូចនេះប្រហែលជានៅក្នុងខែ១០ ឬខែ១១ នៃឆ្នាំ២០២៣ ទើបអាកាសយានដ្ឋាននេះអាចដាក់ឱ្យដំណើរការសាកល្បងបាន។ នេះបើតាមការលើកឡើងរបស់ឯកឧត្តម ស៊ីន ចាន់សិរីវុត្ថា។

ជាមួយគ្នានេះ បន្ទាប់ពីដំណាក់កាលទី១ត្រូវបានបញ្ចប់ អាកាសយានដ្ឋានអន្តរជាតិសៀមរាបអង្គរ នឹងមានសមត្ថអាចទទួលយន្តហោះរហូតដល់ប្រភេទកូដអុី (Code E: A-340-300, A-350-900 and B777-200/300ER, B747-300-400..) ចំនួន៣៨ចំណត អាចទទួលអ្នកដំណើរបាន (២០២៣) ចំនួន៧លាននាក់/ឆ្នាំ និងទំនិញតាមផ្លូវអាកាស(២០២៣) ១០,០០០តោន/ឆ្នាំ។ នេះបើតាមរបាយការណ៍។

គួរបញ្ជាក់ថា អាកាសយានដ្ឋានអន្តរជាតិសៀមរាបអង្គរ ត្រូវបានវិនិយោគដោយក្រុមហ៊ុនAIAI (Angkor International Airport Investment (Cambodia) Co., Ltd) ហើយគ្រោងចំណាយទុនវិនិយោគសរុបប្រមាណ ៨០០លានដុល្លារអាមេរិក។ អាកាសយានដ្ឋាននេះ បានចាប់ផ្តើមដំណើរការសាងសង់នៅថ្ងៃទី១៥ ខែមីនា ឆ្នាំ២០២០ ហើយគ្រោងប្រើរយៈពេលសាងសង់សរុបចំនួន ៣៦ខែ ឬ ៣ឆ្នាំ ដោយបានប្រើប្រាស់កម្មករប្រមាណជាង ១,០០០នាក់ ក្នុងនោះ ៧៥ភាគរយជាពលករខ្មែរ។

ប្រសិនបើគ្មានអ្វីប្រែប្រួលទេនោះ គម្រោងអាកាសយានដ្ឋានអន្តរជាតិសៀមរាបអង្គរ គ្រោងនឹងបញ្ចប់ការសាងសង់នៅថ្ងៃទី៣០ ខែមីនា ឆ្នាំ២០២៣ និងអាចដាក់ដំណើរការសាកល្បង ជាលើកដំបូងនៅអំឡុងខែតុលា ឆ្នាំ២០២៣៕